Despedida (Hora di Bai), de Eugénio Tavares

Hora di bai, 

Hora di dor, 
Ja’n q’ré 
Pa el ca manchê! 
De cada bêz 
Que ‘n ta lembrâ 
Ma’n q’ré 
Ficâ ‘n morrê!

Hora di bai, 
Hora di dor!

Amor, 
Dixa’n chorâ! 
Corpo catibo, 
Bá bo que é escrabo! 
Ó alma bibo, 
Quem que al lebabo? 
Se bem é doce, 
Bai é maguado; 
Mas, se ca bado, 
Ca ta birado!

Se no morrê 
Na despedida, 
Nhor Des na volta 
Ta dano bida.

Dicham chorâ
Destino de home: 
Es dor 
Que ca tem nome: 
Dor de crecheu, 
Dor de sodade 
De alguem 
Que ‘n q’ré, que q’rem... 
Dicham chorâ 
Destino de home, 
Oh Dor 
Que ca tem nome! 
Sofrí na vista 
Se tem certeza, 
Morrê na ausencia, 
Na bo tristeza!